محمّد الفاضل سليمان
بسم الله الرحمان الرحيم
عزيزي الزائر / عزيزتي الزائرة
يرجي التكرم بتسجبل الدخول
سنتشرف بتسجيلك
إدارة المنتدي
شكرا



محمّد الفاضل سليمان

عالم الطفل ، شعر، قصّة ، مسرح ، أناشيد ، علوم للأطفال ، معارف ، سيرة ذاتية للأديب محمد الفاضل سليمان
 
اليوميةالرئيسيةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 المناظرة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد عبد السميع نوح



عدد المساهمات : 2
تاريخ التسجيل : 05/02/2010

مُساهمةموضوع: المناظرة   الجمعة 5 فبراير - 19:34

(( المناظرة ـ مسرحية للأطفال)) عرضت على مسرح الطلائع فى 1/3/ 2007م تحت عنوان ( قولوا للأرض اطمئني) وفازت بالمركز الأول على مستوى الجمهورية

المشهد الأول :
( يفتح الستار على الاستعداد لحقل تقيمه حيوانات وطيور الغابة لتهنئة الملك بعيد الربيع ، بعضهم يبالغ فى تنظيف المساحة بين الأشجار مكان الحفل ، والبعض يعلق لافتات الترحيب ، مثلا :
شعب النمور يبايع جلالة الملك ويهنئه بالربيع .. مجتمع القطط يقدم أصدق آيات المواء للملك المبارك .. للملك من معشر الكلاب أخلص التهانى والنباح الصادق .. اتحاد قبائل القرود يهنىء راعى الغابة وواهب الحرية وملهم الجميع بالنباح والمواء والنقيق والنهيق والثغاء والصياح ... الخ الخ وبعضهم يركب زينة ويالونات ، يدخل النمر ... )
النمر : ها ... ياللا يا جماعة .. موكب جلالة الملك اتحرك .
الكلب : وصل فين يامعالى الوزير الأول وهايكون هنا بعد أد إيه ؟
النمر : ( يتصل بالتليفون المحمول وهو عبارة عن قطعة عظم . يابسة )
مساء الخير يا جلالة الملك .. عبدك المطيع وخادم الأعتاب نمرك ووزير بلاطك .. وصلتوا فين يافندم ؟ توصل لنا بألف سلامة فى رعاية الله ... فى رعاية الله ... مع ألف سلامة .
( للكلب ) على بعد تلت أميال .
الفيل ( يهز خرطومه ) : قلبى حاسس ان فيه قرارات مهمة للملك النهاردة يا
معالى الوزير .
النمر : ما انت قلبك كبير يا قيلو وزير داخلية ملو هدومك ... هيه . كله تمام ؟
الفيل : كله تحت السيطرة .
النمر : عظيم ( نسمع صوت غراب قينزعج الجميع )
. الحق يا فيلو سكت الحيوان دا هيودينا فى داهية

. (يشير الفيل إلى الكلب فيندفع ليطارد الغراب وبعد برهة قصيرة . يعود ومعه الغراب قابضا عليه برجليه الأماميتين ويضعه تحت . الفيل فى حركة تنم عن شجاعة وبأس شديد )

الفيل : ( للنمر ) تم القضاء على المجرم يافندم
النمر : شكرا لوزير داخليتنا الهمام
الفيل : لا شكر على واجب ( يتمشيان على المسرح يمينا وشمالا )
النمر : وإيه أخبار الشعب يافيلو ؟ اهتماماته ، الروح المعنوية ،
النكت .. يعنى
الفيل : بصراحة من يوم ما جلالة الملك قرر ما ياكلشى إلا لحوم
المتمردين والعصاة وأصدر أوامره لأكلة اللحوم ما يكلوش إلا
لحم المتمردين والعصاة ، من يومها والكل مبسوط ومزقطط . وحاسس بالأمن والأمان
النمر : طب آخر نكته ؟
الفيل : بيقول لك مرة واحد أعمى، ربنا كرمه وفتح ، قام من الفرحةاتشل
النمر : شكلها حلو النكتة يافيلو .. أنا عايز اضحك بس مش فاهم
الفيل ما انا كنت زيك كده في الأول ، كنت مش فاهم حاجة
النمر : وبعدين
الفيل : لسه مش فاهم حاجة
النمر : أحسن
( يحط ديك على سطخ الفيل ويطلق صياحا عاليا )
الملك وصل يا جماعة استعدوا للسلام الوطنى
( ينطلق بوق عال وتدخل مجموعة مختلفة من الحيوانات والطيور بعضهم يرش عطرا وبعضهم يحمل كاميرا والبعض يمسك أوراقا وقلما وبعضهم يحمل إبنه على كتفه ليتفرج وتضاء أنوار إضافية ثم يدخل حملة الشموع ثم الراقصون والرقصات ثم يدخل الملك ؛ وعند وصوله إلى الكرسى المعد له فى وسط المسرح تماما يقف انتباه ثم يهدأ الجميع لتدق الموسيقى السلام الوطنى للغابة وهم ينشدون بخشوع ) : ـ
تكُ تكُ تمْ تكُ تكُ تمْ إحنا ولاد الغابة ياعمْ
ناكل منها ندافع عنها نحميها بالروح والدم
تك تك تم تك تك تم
هيا وطنا وفيها غيطانا ترابها دا بيتنا شجرها حيطانا
حدودها حرمنا زعميها هرمنا ف عهد الملك اللى ما فيه ظلم
تك تك تم تك تك تم
أهلا بالملك اللى نصرنا ولا حدش يقدر يكسرنا
من أكبرنا لصغيرنا ما بقاش حد بيحمل هم
( بعد اننهاء النشيد يجلس الأسد ويشير إليهم فيجلسوا جميعا :
ديك . فأر ، كلب ، خرتيت ، حمار الوحش)
. بقرة ، قط ، حصان ، دب ....... الخ
الملك : وزيرنا الأول أبو النمور أنا أشكرك على هذا الإعداد الجيد
النمر : ( ينحنى) دا ييجى إيه جنب عطف مولاى وكرمه ؟
الملك : شكرا .... عندك فقرات إيه السنادى
النمر : كل طايفه من الحيوانات مجهزة استعراض يشرفها إن جلالتك
تبص عليه
الملك : بكل سرور يا أبو النمور ، لكن نسمع الأول تقرير وزير خارجيتنا . الجهبذ الحمار الوحشى ... خير يا أبا الحمير هأ هأ هأ
الحمار : كما يحب مولاى وإن كنت من فصيلة الأحصنة مش الحمير لكن . بناء على رغبة مولاى فأنا كذلك وابن كذلك
تنفيذا لتوجيهات جلالتكم لفيت على كل الغابات .. ووصلت لاتفاق
واضح إن مجلس الأعيان يكون عندنا
الجميع : ها ها ها
الملك : عظيم ... وبعدين ؟
الحمار : وبعد ما نعمل العلم بتاعنا تختار كل غابة شكل العلم بتاعها
اللى يتعلق تحت العلم الرئيسى للإتحاد .. علمنا يعنى
الملك : إذن نحدد شكل العلم بتاعنا
الثعلب : الرسم جاهز معايا يا جلالة الملك .. لو سمحت تشرفه بنور عنيك
( يقدم له قطعة قماش مرسوم عليها الشمس والأسد ينظر
إليها ورأسه كرة أرضية ثم يعرضها على الموجودين )
الملك : هايل ( يصفق فيصفق الجميع )
النمر : ( يقف منتصبا ويؤدى التحية) ، تمام با فندم كله موجود ما
عدا الهدهد
الملك : ( ناظرا إلى الفيل ) فين الهدهد يافيلو ؟
الفيل : حالا يافندم أبعت حد يناديلو
( يرسل الفيل الكلب ليغيب لحظة ثم يجئ الكلب والهدهد
يحلق فوقه )
الهدهد : مولاى الملك .. آسف للتأخير .. أنا كنت جاى طبيعى وقابلت
الكلب عند الباب أنا أسف للتأخير ... لكن عندى خبر مش
ولابد ..عشرة صيادين اصطادوا خرتيت وخدروه وخدوه
معاهم ف عربية ضخمة الظاهر بتوع جنينة الحيوانات .
الجميع : ( بخوف شديد جدا ) جنينة الحيوانات ؟ جنينة الحيوانات ؟
الملك : صبرنا عليهم كتير قوى صنف البنى أدمين دول
النمر : دى مش أول ولا تانى ولاتالت مرة
الملك : إيه رأيكم ؟
النمر : إحنا قوتنا الأيام دى لا بأس بيها ... ونقدر نحقق حلم كل
حيوان ، جلالتك تؤمر تطاع
الملك : (يتنهد) نصبر كمان شوية
النمر : هل يسمح مولاى جلالة الملك أن نبدأ فقرات الحفل
الملك : بكل سعادة سرور إتفضل يا أبو النمور
( يشير النمر بيده اليمنى فيدخل القط ويغنى ويرد الجميع عليه
وبعده تدخل الحيوانات تباعاً )
القط : أنا قط برى مش قطقوط دايما سعيد ومزاجى مظبوط
وخدودى من شجرة تفاح ومخالبى من شجرة بلوط
أنا قط برى مش قطقوط
الكلب : وأنا كلب فارس أحمى وأصون أدى الأمانة مهما تكون
اسهروأحرس كل قطيع لو فيه عدوى عمرى ما أخون
انا كلب فارس أحمى وأصون

الفأر : وأنا فار مفرفر رايح جاى والقط صاحبى شوفوا إزاى !
في عهد مولانا المنصور صوت الغراب بقى نغمة ناى
أنا فار مفرفر رايح جاى
الحمار : وأنا الحمار الوحشى ياناس أنا خلقة عن كل الأجناس
أنا جلدى لوحة بإيد فنان قسمة قسمها ميزان حساس
انا الحمار الوحشى يا ناس
الفيلة : وانا جميلة ام الأفيال باشيل عيال وباحط عيال
وف عهد مولاى المنصور الآشيه معدن والحال عال
انا جميلة ام الافيال
الديك : ديك البلابل صوت رنان عمرى ما باانسى ميعاد لأدان
( تسمع أصوات انفجارات بالخارج : قنابل ... صواريخ ..... )
كوكو كوووووك
( الملك يقف مندهشا ثم يقف الجميع ) إيه ده ؟
النمر : زمانها مصيبة من مصايب البنى أدمين
الثعلب : لو صح ظنى حايكون تفجير منجم من مناجم : الحديد أو الفحم
الملك : فين الهدهد ؟
الهدهد : (يمحنى) رهن إشارة مولاى
الملك : روح قوام استطلع لنا الأخبار
‏الهدد : السمع والطاعة..فى أقل من ساعة لمولاى مالى البطون
وقاتل المجاعة
‏ (ينصرف الهدهد ثم يجلس الملك ويجس الجميع )
‏الملك : ‏إتفضلو كملوا الأحتفال
‏النمر : ‏أنسب فقرة دلوقت يا مولاى هيه رقصة الحصان ، من ناحية
رمز للقوة والشجاعة ومن ناحيه تشد الإنتباه عن
الإنفجارات اللى ممكن تأثر على الروح المعنوية
خصوصا الأطفال
‏المك : ‏على الرحب والسعة .. فليرقص على أربعه ها ها ها
‏( يضحكون ويقدم ‏للملك مشرو ب ثم للحضور فيشربون ويضحكون ) الحصان : فين الغزالة ميادة ( تخرج له الغزاله )
‏شد الحزام قوى يا حمادة رقصنىعلى صوت ميادة
‏خللى اللى يبجى يشوفنى يقول واقف هنا حصان طروادة
شد الحزام قوى ياحمادة
‏الغزالة : ‏أنا تحته أمرك ياعنيه ما احنا فه زمان الحرية
الرقص كله خمستاشر والرقصة دى ميه`الميه
‏ انا تحت أمرك ياعنية
‏النمر . ( هامسا للملك ) أنا خايف يكون فيه مؤامرة لقلب نظام الحكم
الملك ( يزار ) : ‏تفتكر ؟
‏النمر : ‏ليه لأ ؟
‏المك للفيل : قواتك جاهزة لو فيه حركه لقلب نظام الحكم؟
الفيل : يافندم هوه نظام الحكم ليه قلب ؟
‏الملك : له قلب وعقل يا فيلو.. ما تصحى معايا شويه
الفيل : آسف يا فندم أصلى منمتش من 3 ‏أيام 3 × 4 = 12
(يفيق فجأة ) جاهز يا فندم وقواتى جاهزة لأى عملية
(يدخل الهدهد مسرعا...)
‏الهدهد : ‏مولاى الملك ...الأمر خطير
الملك : تفجير مناجم ؟
‏ الهدهد: أخطر
‏الملك : محاوله فاشلة لقلب نظام الحكم ؟
الهدهد : أخطر
‏الملك : قول... شغلتنى
‏الهدهد : فتنة ما بين دول الشمال ودول الجنوب
الملك : ‏عالم البنى آدمين ؟
‏النمر : مش قلتلك يا مولاى دول مش ها يجبوها ألبر ؟
‏الملك : استنى يا أبو النمور ...(للهدهد ) : ‏هيه اللى حصل ؟
‏الهدهد : ‏ دول العالم الثالث بيتعرضو للضرب والغزو من دول الشمال
أوروبا وأمريكا
‏الملك : ‏والأسباب إيه المرة دى؟
‏الهدهد : حاجة كدة زى صراع ..حوار.. صدام
الفيل : اسمه صدام حسين ؟
‏الهدهد : لأ دى حاجة تانيه يافيلو .. خناقة كبيرة بالمدافع والدبابات والطيارات ..ولسه ف أولها ..يعنى ممكن تتلحق يا مولاى
‏الملك : عايزين إيه من بعض ؟
‏الهدهد : ‏الشمال بيقولوا إنهم أصحاب الفضل فى الحضارة الإنسانية
والناس في الجنوب بيقولو انهم أول ناس عملو الحضارة
‏الملك ‏: ( يقلب كفا على كف ) : أمال إحنا نقول إيه بقى ؟
‏النمر : ‏دى أخرة سكوتنا عليهم
‏الملك : قرار عام لجميع سكان الغابة بالانصراف الآن وحفر الحفر
ووضع المتاريس وتخزين الطعام والاستعداد لأى مفاجأة
وإعلان حالة الطوارئ القصوى وينعقد مجس الحرب الآن
‏ ( ينصرفون ويبقى الأسد والنمر والثعلب والحمار الوحشى )
الملك: ‏تقترح إيه يا أبو النمور ؟
‏النمر: ‏نبعث الفيران والبراغيث عليهم بالطاعون ، ونبعث
الناموس والدبان بالملاريا ء ونبعت القطط بأمراض
السل ، والكلاب المسعورة بأمراضها وجيش من الأفاعى
السامة والعقارب وتدخل جلا لتك دخول الفاتح
الحمار : دا عنف مبالغ فيه يا أبو النمور
الثعلب : ‏ما تيجو نعمل مفاوضات معاهم وأنا متأكد إن إحنا هانحقق
مكاسب كبيرة
‏الملك: ‏زى إيه؟
‏الثعلب : كلام أبو النمور يبقى ورقة ضغط في إيدينا ، نقعد
مسئولين الشمال والجنوب مع بعض ويفضوا الإشكال بأى
طريقة ويتفقو على صيانة الأرض وإلا ننقل حكومة الأرض
ف إيدينا وإحنا نقدر نعمل ده .. خصوصا إن الحرب لو
طولت حايبقى الهدف ده ممكن تحقيقه لأنهم حايقطعوا
بعض وإحنا قوتنا سليمة
‏الملك : ( يبدى إعجابه بالفكرة وينظر للحمار والنمر ) :
‏رأيكم ؟
الحمار والنمر: ‏إه نجوب ....والله فكرة
‏ ( يدخل الغراب بعد أن ينعق فينزعج الملك )
الملك : إيه ياوش السعد ( متهكما )
‏الغراب: إلحق يا مولاى ....حريق كبير في المربع بتاع جلالتك
‏الملك : ياساتر يأرب
‏النمر : يا نهار زى بعضه ..هيه حصلت ؟ لحد إمتى هنفضل
ساكتين :؟؟ (ينصرفون مسرعين .... )

(ظــــــلام)


المشهد الثانى
‏( قاعة اجتماعات ذات طابع "حيوانسانى " تستنتج مفراداتها من هذا النص.. الحمار الوحثس(وزير خارجية الغابة)والثعلب رئيس الاستخبارات وفى المقابل زعيم كبير من دول الشمال وزعيم كبير من دول الجنوب ووراء كل واحد من الأربعة يقف مستشاره ‏الخاص وهو من نفس نوعه وعلى هيئته .. يقتحمنا المشهد على النحوالتالى : ـ

زعيم الشمال (يقف غاضبا ): ‏داولا كلام المجانين .. مش ممكن اللى با اسمعه ده لولا ان السفراء لاتقتل كنت قتلتكم .. معقول تحكموا الأرض انتم ؟
الحمار: طب ممكن تهدا شوية وتسمعنى يا سيادة الزعيم
زعيم الشمال : إزاى ؟
‏الثعلب : طب فكر فيها بهدوء..وبعدين دا السناريو الأول وممكن
ما نوصلش له لوحد فيكم أثبت جدارته فى المناظرة ..
ساعتها الطرف الكسبان فى المناظرة هو اللى حايحكم .
‏زعيم الشمال: احنا اللى حانفوز صحيح بس المبدأ ! مجرد الموافقة
على المبادرة مهزلة أودى وشى فين من الناس ؟
‏زعيم الجنوب: ما تتحمقش قوى كده .... المناظرة احنا نكسبها . بس أنا
معاك إن الموافقة على الشروط دى مهزلك
‏زعيم الشمال : ‏بالنسبة لكم انتم ماتفرقش لإن انتم وهما
(يشير للحيوانات ) واحد
‏الحمار : ‏الله يسامحك
‏الثعلب : ‏سقطة لغوية في لحظة غضب .....ما علينا
زعيم الجنوب: أرجو حذ ف الجمله دى من الدفترولازم يعتذر
زعيم الشمال : انتو جابينا هنا تهزؤونا وللا ايه ؟... أنا حا انسحب ( يقف)
‏الثعلب: ‏الطرف المنسحب خسران .. اقعد ( يجلس زعيم الشمال )
أنت من شوية قلت أن الحكم تكليف مش تشريف
زعيم الشمال : ‏دا صحيح
‏الثعلب : ‏خلينا يا أخى نشيل شويه همومكم ..دا في حالة محدش كسب
زعيم الجنوب : طب يا جماعة نخلى مسألة نقل الحكومة للغابة لمدة محدودة يعنى فترة إنتقلية أسبوع أو شهر أو سنة لحد ما إلأمور ما تهدا
‏زعيم الشمال : ‏أنا مش موافق لأن أنا الأقوى
الحمار : ( يأخذ زعيم الجنوب ويتمشى خطوتين لليمين...... ) دا بنى
ادم مغرور وقبولك للا تفاقية حايزنقه وتقدر ف المناظرة تمسحه
‏الثعلب: ‏ ( يتمشى مع زعم الشمال خطوتين لليسار ..)
‏ دا حيوان جاهل زى ما انت قلت بس مش عايزين نجرح ف
بعض وأنت طول ما أنت مصر على الرفض حايتخيل انك خايف
من ألمناظره وأنت عارف ان المناظرة هيه البند الأول
في الاتفاقية. وبعدين ف أسوأ
‏ الإحتمالات لو الحكومة بقت ف إيدينا حالبسك وش زى ده
‏ (يخلع الماسك إلذى يلبسه ثم يلبسه مره أخرى )
‏ونعملك وزير خزانه وانت عارف إن الغابه فيها خزاين كتيرة
زعيم الشمال : كلام رجاله
‏الثعلب : طبعا
‏ ( يعودون إلى مائدة المفاوضات)
‏زعم الجنوب ( للحمار ) : طب ليه الملك بتاعكو مجاش ؟
‏الحمار : ف البروتوكول إنه لو جه يبقى رؤساؤكم كلهم لازم ييجو
زعيم الجنوب : ‏ما علينا ...طب لو حصل ..حاتبقى حكومتكم دى منخبة ؟
‏الحمار : طبعا الملك بتاعنا ومجلس أعيان الغابة بالانتخاب ( يهمس له ) :
وأنا أوعدك فى الإنتخابات الجايه حيبقى لك صوت وعالى كمان
زعيم الجنوب: ‏ كلام رجالة ؟
‏الحمار: ‏طبعا
‏زعيم الجنوب: ‏أنا قبلت المبادرة بكل بنودها ( ينظر لزعيم الشمال بغيظ )
‏زعيم الشمال : أنا من الأول كنت قابلها بس بتفرج عليك وانت خايف وبتترعش
‏زعم الجنوب: ‏حانشوف ..المهم اللى يضحك في النهاية
‏ ( يميل كل من الأربعة على مسشاره ويطمئن على موافقته له فى الرأى)
‏الثعلب : على بركة الله
‏( يقدم الأوراق ويوقعون عليها ثم يحمل كل مسشار من الأربعة
نسخة منها وينصرفون من أى باب )
‏الحمار : تسمحوا نبدأ مؤتمرنا الصحفى
‏ ( قبل أن يوافقوا يشر بيديه فيدخل أى عدد من الصحفيين )
‏صحفى 1 ‏: ( للثعلب ) اسمى بستان أبو الفل مراسل صحفه قشطه ياعم
الثعلب : دى صحيفة قومية وللا أهالى
صحفى 1 : لأ أهالى بتاعة السيد قشطة
الثعلب : دا يقرب للسيد قشطة بتاعنا ؟
صحفى 1 : هما عيلة كبيرة ... ممكن لإنه متعاطف معاكم جدا .. على أى حال نقدر ناخد إجابات لبعض الأسئلة اللى شاغلة الرأى العام ؟
الثعلب : إتفضل
صحفى 1 : إلى أى حد استخدم الثعلب وهو رئيس المخابرات ذكاءه حتى وافقت الأطراف كلها ؟
الثعلب : ف الواقع لا ذكاء ولا حاجة ... الواد بتاع الشمال مغرور بس خايف من هجوم حيوانات الغابة .. والأخ الزميل بتاع الجنوب نفسه أى حاجة توقف الحرب اللى ف أولها
صحفى 1 : ياترى تحقيق الأمن والأمان والسلم والسلام وللا نقل الحكومة ف إيديكم كان الهدف الأول من المفاوضات ؟
الثعلب : ف الواقع نقل الحكومة بالشكل المقترح ده حايضمن تحقيق الأمن والأمان والسلم والسلام
صحفى 1 : طيب لو كانوا رفضوا كان هيبقى إيه التصرف ؟
الثعلب فى الواقع هما كانوا رافضين ف الأول ولكن مع التفاهم والصبر ربنا سهل
( طرف من حوار آخر مع الحمار )
الصحفى 2 : برضه سيادتك لسه بتتهرب من الإجابة على سؤالى
الحمار : خرموا طبقة الأوزون بالشنيور النووى سكتنا ... لوثوا مية البحر بالبترول والمازوت وغسيل المواعين وسلالة البلهارسيا سكتنا .. ملوا الهوا بأول وتانى وتالت ورابع أكسيد الكربون سكتنا .. كل ما يشتموا حد يقولو له يا حيوان كأن الحيوان ده لعنة دا غير المسخرة اللى عاملينها ف جناين الفرجة مش هاقول جناين الحيوانات لأن دا عيب كلنا مخلوقين من طين .. وإحنا عمرنا ما فكرنا نعمل جناين بنى آدمين نحبسهم ونجيب عيالنا يتمهزأوا بيهم
صحفى 2 : أحد المستشارين سرب خبر إن فيه بنود سرية في الاتفاقية إيه رأيك ؟
الحمار : لأ والنعمة الشريفة ... مين الأهبل اللي قال كدة وأنا أضربه بالقديمه
صحفي 2 : ياتري ها تنشروا نص الإتفاقية ؟
الحمار : علي أي حال بعد المناظرة حانعمل موازنة ونشوف ننشرها وللا نحتفظ بيها وبعدين عايز أقولك حاجة ...........
صحفي 1 : بعض وكالات الأنباء أذاعت إن فيه أخطاء فادحة في ترجمات نصوص الاتفاقية ممكن سيادتك تلقي الضوء علي هذه النقطة؟
الثعلب : في الواقع إن الترجمة شئ مهم جدا وكليات الألسن واللغات والترجمة علشان نقف علي أخر ما وصل اليه العالم في الطب والهندسة والفن والأدب , يعني مثلا خد عندك أحمد زويل
صحفي 1 : قبل الدكتور أحمد زويل يا فندم إيه توقعاتك لمستقبل الارض ؟
الثعلب : لو إستمرت الحرب تبقي كارثة ولو إنتهت تبقي أمامنا فرصة مناسبة للرخاء والسلام
( يدخل الحاجب )
الحاجب : ( للثعلب ) : الأتوبيسات جاهزة يافندم
الثعلب : حددتوا مكان المناظرة ؟
الحاجب : علي الشطين بتوع مضيق جبل طارق
الثعلب : للحمار حاتردموا المضيق وللا حانئزح من فوقه ؟
الحمار : أفتكر كام فلق نخلة لو استدعي الأمر
الثعلب : لو استخكم الأمر نستعمل مكبرات الصوت
الحاجب : التعليمات الصادرة عن مولانا إن فريق الشرق يكون ف البر الشرقي ناحية المغرب والجازائر وتونس وفريق الشمال يكون ناحية أسبانيا / وفيه ضيوف جايين
الثعلب : تعرف حد منهم ؟
الحاجب : سمعت إن حمار جحا لما سمع بالمناظرة قرر إنه ييجي .. مجرد إشاعة وكمان حمار الحكيم وحمار العقاد
الحمار : هوا العقاد ليه حمار ؟
الثعلب : ياللا يا جماعة هنتأخر
( نسمع سارينات سيارات وحركة وكركبه ثم يحملون حقائبهم ويغادرون )
الحمار : ممكن يكون له حمار أمال هوا ألف الحاجات دي كلها إزاي ؟ .. إه جايز بس محدش قاللي .. ياللا وأنا مالي
( ظـــــــلام )
المشهد الثالث
( مضيق جبل طارق بشاطئيه , الأيمن البر الشرقي دولة المغرب وعليه زعيم الجنوب ومستشاره ووفد ..... الأيسر أسبانيا البر الغربي وعليه زعيم الشمال ومستشاره ووفد .. فوق المضيق
أو علي الحائط أو قارب فوق الماء يجلس الحمار والثعلب يديران المناظرة , ويجلس بجوارهما ثلاثة حمير : حمار جحا وحمار الحكيم وحمار يدعي أنه حمار العقاد , أما القرد فنراه يتنقل ما بين منصة الحكم وأرض المتناظرين يمينا تارة وشمالا تارة مع كل فريق من المتناظرين مكبر صوت ومع لجنة التحكيم أيضا .. ومع كل فريق من المتناظرين لفافات ورق أو بقج قماش أو أكياس بلاستك بلاستك بأي عدد ومملوءة بأي شئ صفارة طويلة ثم ):-
الحمار : نحييكم من مضيق جبل طارق في مناظرة لتحديد مصير العالم , دول الشمال المتقدم علي شمالك بالفانلة البرتقالي .. دول الجنوب المتخلف وال موش متخلف قوي يعني نص نص علي يمينك بالفانلة البيضا والكل متأهب للفوز .. طبعا والكل متأهب للفوز .. طبعا كل فريق من حقه يحلم بالفوز ..
(دلوقت حانشوف مين حايبدأ بتوجيه الاسئلة .. مين الملك ؟)
الجنوب والشمال : أنا
الحمار : مين الكتابة ؟
الشمال والجنوب : انا
الحمار : ( يخرج قطعة نقود معدنية ويقلبها ثم يرفع كفه عنها ) كتابة
زعيم الشمال : نبدأ بكلامكم
( حمار جحا يلبس طرطور جحا وحمار الحكيم يلبس قبعة الحكيم والحمار الثالث يلبس قبعة العقاد ) عن الشمس والقمر والنجوم لسه مصممين علي موقفكم ؟
زعيم الجنوب : طبعا .. الشمس والقمر والنجوم عرب ... حتى اسألوهم
زعيم الشمال : موش ممكن يكونوا عرب .. الحاجات دي أوربية علي أمريكية
زعيم الجنوب : طب ورحمة أبويا وعمي وعمتي وخالتي ورحمة جدودي عرب
زعيم الشمال : عندك أدلة ؟
زعيم الجنوب : المتنبي شاعر العرب اللي بيقول لسيف الدولة :
كأنك شمس والنجوم كواكب إذا ظهرت لم يبد منهن كوكب
والفنانة شادية غاب القمر يابن عمي ياللا روحتى
والفنان عبد الحليم حافظ النجمة مالت ع القمر فوق العلالي
و فايزة أحمد : يا امه القمر ع الباب نور قناديله
( يغني وفد الشرق والشرق هو الجنوب كما أن الغرب هو الشمال ) يا امه أرد الباب وللا أناديله ياامه امه
وعندنا مجلة النجوم ومجلة الكواكب .... دا حتي الكرة الارضية ( يفتح كتاب ضخما ويقرأ منه ) عربية وإحنا مستحملينكم علشان عضم الطربة أبونا أدم وأمنا سيدة الأرض الأولي حوا ألف رحمة ونور عليهم الفاتحة لهم الفاتحة
زعيم الشمال : هأ هأ ضحكتني ياسمك إيه .. أنا عايز دليل علمي
زعيم الجنوب : معذور ... جاهل ... معاش .. ما انت لا بتقرا ولا بتسمع
زعيم الشمال : طب سمعني .. سمعنا
( يغني وفد الشمال .. سمعنا ياريس حنتيرة .. سمعنا – سمعنا )
زعيم الجنوب : الشيخ سيد مكاوي
زعيم الشمال : الف رحمة ونور عليه الفاتحة له الفاتحة
زعيم الجنوب : بقي له اكتر من خمسين سنه بيقول : الأرض بتتكلم عربي
زعيم الشمال : يقصد الحتة الأرض بتاعتكم
زعيم الجنوب : لأ هوا قال الأرض .... مقالش الوطن العربي لا مؤخذه
زعيم الشمال : يابني فوقوا بقي ... انتو عايشين ف غيبوبة
زعيم الجنوب : ( متهكما ) انتو اللي عايشين في حضورة
طب عندكم الشمس بتاخد سنان الجمايس وتجيب سنان العرايس؟ هه ؟ وللا عندكم واحدة قالت للقمر قوم وانا اقعد مطرحك ؟ هه ؟ احنا عندنا كتير وكانه واحد من العيلة .. طب عندكم حد بيوري حد النجوم في عز الضهر .. هه ؟ احنا عندنا الضهر اكتر من بالليل ( يخطف مستشار الجنوب الميكروفون من زعيمه )
مستشار الجنوب: طب قول يا لمض انتو بتدلعوا القمر ؟ احنا بندلعه ونقول قمور طب بتجموه جمع تكسير ؟ احنا بنقول قمامير يا ابني عيب اجر العب اجري ( يعلو هتاف الجنوبيين شيحتاه ... شيحته ...... هو ...... هو )
زعيم الشمال : تقدر تقوللي مين اللي عرفكم كل المعلمومات المهمة عن الفضاء في العصر الحديث , زي مثلا حجم الشمس ... وزنها ... سرعتها.. مسافتها وكذلك القمر والنجوم وليه ما طلعتوش هناك زينا ؟
مستشار الجنوب : طفرة علمية مؤقتة ... وبكرة ترجع ريما لعادتها القديمة
زعيم الشمال : لأ حاسب كل شئ في حياتكم من اختراعنا بص حواليك وشوف
زعيم الجنوب : ( يمسك الميكرفون بعصبية ) تقصد حضارة الزخرف والألون الفاقعة .. حضارة البلاستك والتيك اواي ... حضارة الأسلاك اللي بتسموها ديمقراطية ... حضارة الظلم والعدوان والبطش بالأبرياء ؟
مستشار الجنوب : ( بدون ميكروفون ) والدش والانحلال وملابس الموضة ؟
زعيم الجنوب : خدوها موش عايزينها ... وهاتو الحاجات بتاعتنا
زعيم الشمال : اد كلمتك
زعيم الجنوب : أدها وأدود .... وحاتشوف
زعيم الشمال : هاتوا كل أجهزة الكمبيوتر والفيديو والتلفزيون ( مع استرداد اللفف يخفت الضوء تدريجيا في الجانب المعطي ... ويأتي القرد بحركات معبرة حسب الموقف بحركات صامتة مع كلا الطرفين )
زعيم الجنوب : ( يلقي لفة في وجهه ) خد في ستين داهية
زعيم الشمال : والراديوهات والتليفونات
زعيم الجنوب : خد
زعيم الشمال : والساعات
زعيم الجنوب : خد ( ويخلع ساعته ويلقيها )
زعيم الشمال : والطيارات والقطارات والحافلات والميكروباصات
والعربيات الملاكي
زعيم الجنوب : خد
زعيم الشمال : والكام قمر صناعي بالكتالوجات بتاعتهم والضمان
زعيم الجنوب : قوي قوي خد
زعيم الشمال : وآلات التصوير التلفزيوني والسينمائي
زعيم الجنوب : خد بلا وجع دماغ أقللو تريحنا من مسلسلات الساعة تمانية
وربع كل يوم
زعيم الشمال : وكل العلاجات والأجهزة الطبية والنظارات
زعيم الجنوب : و إيه يعني ... مالها الأعشاب ؟ خد اشبع بهم
زعيم الشمال : هات بقي يالمض .. الكهربة
زعيم الجنوب : بتقول اية؟
زعيم الشمال : بااقول الكهربة
زعيم الجنوب : طب خليها لاخر المناظرة
زعيم الشمال : لا دلوقت
زعيم الجنوب : ماشي خد (يظلم الجانب الأيمن ويتعطل الميكرفون
فيتكلم بدونه )
زعيم الشمال : ازيكو بقي ؟ ( حركات معيرة يؤديها القرد يعلو صوت الهتاف في الشمال بكلام غير مفهوم )
زعيم الجنوب : استعنا ع الشقا بالله ( يأتي القرد بمبخره ويبخره ثم يقدم له كوبا من الأعشاب)
القرد : خد يا زعيم كباية أعشاب من اللي وصي عليها داود الأنطاكي في التذكرة .. اشرب وروق ( يشرب زعيم الجنوب )
زعيم الجنوب : حانتكلم عن فترة نهاية العصور الوسطي .. ونبدأ من الحروب الصليبية مع أنكم كنتم المستعمرين لكن علمناكم بناء الحصون وطرق الحصار واستعمال المجانيق والدروع للفرسان والخيول وكمان استعمال الحمام الزاجل في المراسلة وصدرنالكم زراعة محاصيل زي السمسم والليمون والبطيخ والتوابل والأعشاب والعقاقير الطبية والأصباغ تسمح تجيب الحاجات دي كلها وكل ما ترتب عليها ؟
زعيم الشمال : بس كده ؟ خد
زعيم الجنوب : فى النص التانى من القرن العاشر كانت قرطبة ـ طبعا تعرفها ـ كانت عاصمة الخلافة الأموية في الأندلس (200000) ميتين ألف بيت واكتر من مليون نسمة الشوارع كلها منورة بالليل .. ومع ذلك قعدت لندن بعد التاريخ ده (700 ) سبع ميت سنة ضلمة كحل ما فيش مصباح واحد في شارع من شوارعها ولما علمناكم طورتوا الحاجات دى تسمح تجيبها وكل ما ترتب عليها ؟
زعيم الشمال : خد ( يظلم الجانب الأيسر ويتعطل الميكرفون فيه )
زعيم الجنوب : و ف قرطبة ترجمنا كتير من مؤلفات علماء وفلاسفة اليونان زي جالينوس وايبقراط وأفلاطون وأرسطو واقليدس وانتم أخذتوا الترجمة وطورتو عليها هات الحاجات دي وما ترتب عليها
زعيم الشمال : (يبلع ريقه ويرتبك ) خو خو خد
( يقترب منه القرد ويبخره ويقدم له مشروبا )
القرد : خد يا زعيم كاس م اللي انتو بتحبوه اشرب وروق
زعيم الجنوب : في القرن التاسع في صقلية اهتمينا بالزراعة وحفرنا الترع وعملنا شبكة الري ودخلنا زراعة القطن وقصب السكر وصناعة الحديد وصناعة الحرير واستخرجنا الفضة والنحاس والحديد والكبريت من باطن الأرض
القرد : وأنا شاهد
زعيم الجنوب : وعلي فكرة المستشرق لوبان قال إن مافيش في أسبانيا كلها من أعمال الري إلا اللي أنشاه المسلمين
القرد : آي نعم الباشمهندس جوستاف لوبان قال كده قدامي
زعيم الجنوب : ياللا هات الحاجات دي وكل ماترتب عليها
زعيم الشمال : خد خد
زعيم الجنوب : في القرن ال13 كان الملك الفونس العاشر بيحارب المسلمين في مدينة الجزيرة في الأندلس ولما المسامين أستخدموا المدافع النارية لأول مرة بعد ما طورا البارود اللي اكتشفوه بتوع الصين كان في الحرب دي اتنين من الكونتات الانجليز هما الكونت دربي والكونت سالبوري راحوا جري علي بلدهم بالاكتشاف الجديد وبعد أربع سنين الانجليز استخدموه في حربهم مع فرنسا الحرب اللي استمرت ميت سنة حرب كريمي
القرد : وانا كنت قائد كتيبة فيها وعندي إصابه أهه ( يكشف ما بين رجليه )
زعيم الجنوب : تسمح تجيب الاختراع ده وما ترتب عليه ؟
زعيم الشمال : خد
زعيم الجنوب : الورق اللي اخترعه الصينيين كان من شرانق الحرير واحنا طورناه وعملناه من مواد رخيصه
( يتهامس الحمير الثلاثة الضيوف ويضحكون ويشيرون إليه مستحسنين ) وخد عندك : استخدم الورق في الصين سنه 105 وفي مكة سنه 707 و ف مصر سنه 800 و أسبانيا 950 والقسطنطينية 1100 وصقلية 1102 وإيطاليا 1154 وألمانيا 1228 وإنجلتر 1309 وظلت كلمة رزمة العربية شائعة عندكم لحد دلوقت ياللا هات بقي
زعيم الشمال : خد
القرد : ( لزعيم الشمال ) إزيك بقي ؟
زعيم الجنوب : هات نظرية الضوء والتصوير للحسن بن الهيثم وما ترتب عليها
زعيم الشمال : خد
زعيم الجنوب : وصورة الأرض وكتب الجغرافيا والفللك للإدريسي
زعيم الشمال : خد
زعيم الجنوب : ممكن بقي يا جميل تسلمنا طب ابن سينا وما ترتب عليه ؟
زعيم الشمال : خد
زعيم الجنوب : وفلسفة الفارابي و ابن رشد وترجمتهم لتراث اليونان
زعيم الشمال : ( يكاد يبكي ) خد طظ فيك وفي اليونان
(ضحكه غريبة يطلقها القرد ونهيق للحمير الضيوف )
زعيم الجنوب : عايزين الاسطرلاب اللي عرفتوه مننا في القرن 11 , 12 والبندول اللي اخترعه ابن يونس المصري والمستشرق سارتو هو اللي قال كده .. ياللاهات
القرد : اه قال كده قدامي هوا قاعد هنا .. وانا قاعد هناك
زعيم الشمال : خد
زعيم الجنوب : فاكر كلمة المستشرق لوبون برضه لما قال لو لا علماء الكيمياء العرب ما كانش حايبقي لافوازييه ابو الكيمياء الحديثه عندكم
القرد : أي والنعمة الشريفة قال كده
زعيم الجنوب : تسمح تجيب فوازييه وما ترتب عليه ؟
زعيم الشمال : خد
زعيم الجنوب : حتي كلمة كيميا حرفتوها عندكم وبقت سيميا وشيمستري بالانجليزي والكحول بالفرنسية ال كول وبالانجليزي ال كهول والقلويات اكالي وغيرها كتير تسمح ترجع كل حاجة مكانها
زعيم الشمال : خد
زعيم الجنوب : احنا اساتذكم ومن شدة اعجابكم بالخط العرب نقلتم حاجات مكتوبة علي انها مجرد زخرفة وقلدتوها بجهل
زعيم الشمال : زي ايه يعني ؟
زعيم الجنوب : صليب ايرلندي مطلي بالبرونز من القرن التاسع مكتوب في وسطه بالخط الكوفي بسم الله الرحمن الرحيم
القرد : ( ينظر لزعيم الشمال ويشلشل )
زعيم الجنوب : في كنيسة القديس بطرس كتابة عريبة حول رأس السيد المسيح عليه السلام فوق الأبواب اللي أنشاها البابا أبو جينوس الرابع ( 1431-1447 ) والكتابة بالكوفي العربي علي قميص القديس بولس والقديس بطرس والعبارة هيه ايه؟ العبارة هي لا اله إلا الله محمد رسول الله والمعلومة دي منقولة عن المستشرق جوستاف لوبان
القرد : ( يشلشل ويتقافز )
زعيم الشمال : افتكر دا موش في صلب المناظرة
زعيم الجنوب : ما تزعلش هاتوا الصفر اللي قلب موازين رياضة بطليموس وغيره و ف لمح البصر يخلي الوحد عشرة والعشرة ميه والمية الف إلي اخره بدل العجن اللي عمره ما كان حايخلي العلم يتقدم ياللاهات الصفر ( يشخط فيه ) هات الصفر .. هات الصفر ، إب بالصفر .. وهات كل اللي نرجمتوه من مؤلفات محمد بن موسي الخوارزمي وقعدتو تدرسوه في كلياتكم لحد القرن 16
زعيم الشمال : خد خد خد
( يزداد الظلام وصوت الرياح ونعيق الغربان وكلمات مثل خراب , دمار كخلفية للمشهد ونري حركلت أشباح وجوا مخيفا كئيبا .. )
الحمار : أنا شايف إن المناظرة طولت ياجماعة ( ينظر للضيوف ويتشاورون )
زعيم الجنوب : لسه عندي كتير .. لسه فاضل الفلك والموسيقي ونظم التعليم لسه فيه أسامي ووقائع وتواريخ وأحداث مهمة
زعيم الشمال : زي ايه
زعيم الجنوب : احنا لسه واقفين علي رجلينا حد ما يعرفش العالم المصري أحمد زويل واللا العالم المصري فاروق الباز واللا الدكتور مجدي يعقوب وعمنا الكبير نجيب محفوظ ؟ هه ؟
حمار جحا : دا جحا نفسه لو شاف اللي شفته النهارده حايندهش
حمار الحكيم : الحكمة تقتضي أن نتوقف عند هذا الحد
الحمار الوحشي : وأنا با اعلن انتهاء المناظرة دون انتصار أي من الطرفين ( تعلوا أصوات مختلفة لجميع الحيوانات تعلن الفرحة بينما ينكس كل الناس رؤوسهم من الخزي والندامة ) والأن إلي مراسم تسليم قيادة الأرض
حمار جحا : يعني جحا حايبقي حماري وانا ابقي جحا أروح اناديله
حمار الحكيم : وأنا حا ابقي الحكيم ياحلو للي يا حلوللي أروح اناديلة (ينادي وهو يخرج) تيفا .. يا تيف ..ا
الحمار الثالث : ( يختبئ وراء أحدهم )
( يدخل الملك ومعه النمر حاملا كشافا من شعلة بدائية)
الاسد : يعني عاجبكم كده ( القرد يردد ... يعني عاجبكم كده )
زعيم الشمال : ( يضع مسدسة في فمه استعدادا للانتحار ) الوداع يا عالم
الأسد : (يزأر ) نزل إيدك
القرد : انشاللا تنشل في ايدك نزلها ياله
( يخفض يده ويتراجع )
زعيم الجنوب : موش كنا أصحاب أحسن ؟
الثعلب : مولاي الملك المعظم علي ما نشكل الحكومة الجديدة معانا لك وجبة غدا محترمة ( يشير إلي الحمار الثالث ) الحمار ده الكداب
الأسد : عندي أخبار ان فيه حمار كداب عامل نفسه حمار العقاد قوللي يا فيلو هو العقاد كان له حمار ؟
الفيل : أظن كان له قطر يا مولاى
الأسد : يبقى حلال عليكم لحم الكداب
الحمار الثالث : عفوك يا مولاى ارحمنى يا مولاى ما عنتش اعملها ... اخر مرة
الأسد : (للزعيمين ومستشاريهما ) دلوقت بإشارة منى تكون حكوماتكم فى الباى باى .. كله متحاصر بملايين لأبمليارات من حيواناتنا حايجيبو عاليها و أول حاجة انفلونزا الطيور اللى منتشرة ودى مجرد إنذار ، تاني حاجة أنفلونزا الخنازير لسه في أولها ، ونقدر ننشرها على شبكات النت ، أنا لسه حايش عنكو بلاوى كتيرة إنما بقى لو فتحناها ع البحرى معاكم موش حا تلاحقو ........
وبعدين أى حركة ندالة حانفترس التلت ميت بنى آدم الرهائن اللى خدناهم يوم الحريقة إياها ورؤساءكم حفيوا علشان ياخدوهم ودا طبعا مستحيل إلا بعد ما توقعوا ع الاتفاقية الجديدة .
النمر : بعد إذن مولاى الملك ... نفسى أقول كلمة
الأسد : اتفضل يا ابو النمور
النمر : أنا با اشكر سيادة الحمار الوحشى وزير الخارجية الحصيف وبا اشكر كمان معا لى رئيس الاستخبارات الثعلب المكار على إنجاح مشروع المفاوضات والمناظرة وبا أشكر الجمهور الواعى على الشطين وبا ا اقدم شكر خاص للقرد رئيس هيئة تطييب الخواطر
القرد : (يزغرد) جبر الخواطر على الله
النمر : وشكرى الخاص للضيوف الكرام وبالذات حمار جحا اللى ساب كل مشاغله واهتماماته ؛ وشكرى للحاضر الغائب جحا بتاع الشرق وجحا بتاع الغرب وكمان با اشكر حمار الحكيم وهو طبعا عنده خبرة كبيرة بكل اللى أتقال
حمار الحكيم : أنا فعلا كنت با اعمل كتاب مهم زى ما عملت عصفور من الشرق كنت بألف كتاب اسمه غراب من الغرب قصدى البيه بتاعى بس كان حايحط صورتى على ضهر الغلاف
النمر : على أى حال نسمع قرار مولانا جلالة الملك بس با احب أفكر الناس باللى ممكن يحصل ... الحكومة مننا والشغل حايبقى بالدور وما فيش فرق ما بين مخلوق ومخلوق .. لو الغدا برسيم يبقى ع الكل
.. العربية الكارو ممكن يجرها وزير ، ممكن الجزار يبقى نمر والدبيحة بنى أدم .. فاهمين ؟ لو الحيوانات طلبت جناين بنى آدمين عشان الصغيرين يعرفوا الفرق بين الأفريقى والاسترالى وما بين سلالات الملوك ورؤساء الدول وما بين العامة حا نعمل جناين آدمين ودلوقت مع كلمة جلالة الملك .
الأسد : تكريما للضيوف حانسمع رأى حمار جحا وحمار الحكيم
حمار حجا : معايه رسالة من سيدى جحا بيتمنى انكم تخفو عنه شوية موش كل حاجة عجيبة تلزقوها فيه ... الحاجة اللى تدل على ذكاء آى نعم والحاجة اللى تدل على غباء
القرد : آى لأ
حمار جحا : وتفكروا شوية وتشغلوا عقولكم ووصانى أسيب لكم الإميل بتاعه دبيو دبيو دبيو جحا دوت نوط شكرا
الأسد : اتفضل حمار الحكيم
حمار الحكيم : سيدى توفيق الحكيم زعلان لأن ما حدش بيقرأ وهو وصانى إن القراية هيا الطريقة الوحيدة للسعادة والتقدم كمان ... وهو أقصد سيدى أفنى عمره فى القراية والكتابة عشان الدنيا تتقدم ومع ذلك فيه ناس وناس مالهاش دعوة ، أرجوكم خلوه ينبسط فى جنته وإلا مولاى الأسد حايشوف شغله
الأسد : شكر للسادة الحمير ودلوقت اتفضلوا اقروا الاتفاقية وبصوا عليها وللاننقل الحكومة فورا وابقى أنا ملك الدنيا وما عليها
الزعيمان ومستشارهما : مواقين والله موافقين
الأسد : طب اقروها
الزعيمان : من غير قراية
الأسد : طب امضى انت وهوا
الزعيمان : احنا بنبصم
الأسد : مافيش حرب ؟
الزعيمان : ولا خناقة صغيرة
الأسد : ولا تجارب نووى ؟
الزعيمان : ولا ذرة إلا فى توليد الكهرباء والحاجات اللى ما فيهاش أذية
الأسد : ولا تتكبروا على الحيوانات ؟
الزعيمان : إزاى ؟ .. دا إحنا شئ واحد !!
الأسد : تحطوا إيديكو ف إيدينا نعمر الأرض ونعيش شعوبنا ف رخاء
(يضعون أيديهم فى ايدي بعضهما البعض وينشدون وهم يتبادلون اللفافات )
قولوا للأرض اطمئنى أنا مش هاا بكى ها اغنى
والحروب الدايرة فيها إوقفوهــــا بأمر منى
قولوا للأرض اطمئنى
قوللوا للكُرْه استخبى قلبى مليان بالمحبة
اعدموا كل القنابل وازرعوا شجر التمنى
قولوا للأرض اطمئنى
شوفوا كام عيان بيكشى والعيون البايته تبكى
والحيارى والسهارى محتاجين للعطف يعنى
قولوا للأرض إطمئنى
مش كفايا نقول كلام عمروهـــا بالسلام
واللى يعرف يعلا يعلا واللى يقدر يبنى يبنى
قولوا للأرض اطمئنى
السلام مكتوب علينا زى أرواحنا وعنينا
مهما رحنا ومهما جينا اللى ساكنكم ساكنى
قولوا للأرض اطمئنى
شوفوا أسراب الطيور طالعة فوق من غير غرور
وانتو لما طلعتو حبه يابشـــر خيبتوا ظنى
قولوا للأرض إطمئنى
ستار
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
المناظرة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
محمّد الفاضل سليمان :: قصص الأطفال :: مسرح الطفل-
انتقل الى: