جالس وخالط واحتذر واتجنَّب ولا تحقر الناس ولاتعتابْ
واحفظ لسانك لا تذل لا تكذب وابعد عن ابنادم الكذابْ
وخمِّمْ على نفسك وقيْس وجَرّبْ تلقى العلوم بكلها تنصاب
وعلم الخلطة يحبلو المدرّب اللي قرى وختم كل كتاب
كثير الشروط ظهر وبان وقرّب في وقتنا هذا الخلط صعاب
واجب على الإنسان يعمل صاحب ويبجّلوا على جملة الأحباب
موش فيسَعْ يقول هذا يعجب لا بدْ من التّقليب والتّجراب
قليل الحياء مافيه مايتقلّب والرّمز رخوة ما معاه جواب
والسّافل والطمّاع عنهم شطّب واللص والديّوث والقلّاب
والنمّام والقرطال والمتشقلب هاك عندو حتى العوج صواب
هذوهم تسعة غير ثبّت واحسب واقرا العواقب قبل كل حساب
فمّة اللي ظاهرة متقلّب وفي الباطن أنحس من قدح شراب
مثل الكلب عقبة بن مصعب سلّط الله عليه كل عذاب
كان شيخ في الإسلام طاهر يخطب وهو منافق في القفاه كذّاب
نرجع نحدثكم بلفظ باهي يعجب اصغوا كلامي يا أولي الألباب
يفوز العبد اللّــــــي قْرى وتأدّب ويبقى نظيف العرض والأثواب
وعجّل بولدك طلّعوا للمكتب قبل الّبلوغ أدّيه للكتّاب
والبنت علّمها تقر وتكتب جميع العلوم الكل والحساب
يا عبد إنْهِ النّفس واعكس واغلب وزيد ركّبلها لجام لا تسياب
راهي صعيبة مثل المهرة تلعب يبغيلها فارس قليد ركاب
ساعة يسايِسْها وساعة تِغلب حتى يرجع سيرها مصواب
تبّع طريق الحق أولى وانسب طريق الصّلاة والذّكر والأحزاب
يرتاح مولاها وليس يتعب والِّي معاه اله ما يغلاب
كلامي صحيح مافيه ما يتشطّب مولاه جاز الشّعر والأرتاب
شقرون قاسم بن علي من المغرب يقرى سلامُو لجُملة الأحباب
شقرون قاسم بن علي
السبت 16 أغسطس - 3:03